Godt laksefiske i 2001

Det er rapportert inn fangstar på totalt 20 731 kg laks og 8462 kg sjøaure frå elvefisket i år.  Laksefangsten er om lag som i fjor, då det vart ein opptur etter dei historiske botnsesongane 1996-99.  Fangsten av mellomlaks viste ytterlegare framgang, medan fangsten av smålaks var dårlegare enn i fjor.  Det vart fanga få storlaks også i år, og faktisk vesentleg færre enn i den dårlege laksesesongen 1996.  Med innrapporterte fangstar frå sjølaksefisket på 31 945 kg laks vart den samla laksefangsten på 52 676 kg i år, som er det høgaste sidan 1995.  Nausta er med ein laksefangst på 5 279  kg også i år den beste elva.  Den samla sjøaurefangsten ligg på nivå med fangstane dei siste fem åra, men lågare enn dei beste åra på 1990-talet då det vart innrapportert over 10 tonn. 

Den generelle trenden om godt lakseinnsig gjeld heile landet.  Fleire vassdrag i fylket må tilbake til 1980-talet for å vise til tilsvarande fangstar som i år.  Det må likevel understrekast at det ikkje har vore grunnlag for laksefiske i mange kjende elvar som Strynselva, Oldenelva, Nærøydalselva, Flåmselva og Jølstra.  Det er dokumentert skadar og sannsynleg stor daude av laksesmolt spesielt i Sogn dei siste vårane, og truleg er belastninga størst for elvane inst i fjordsystema.  Smoltårsklassen som vandra ut frå elvane i Nordfjord i fjor vart lite råka av lakselus, og dette kan forklare det gode innsiget av smålaks i regionen.  Innsiget av og fisket etter smålaks i Sogn var ikkje tilsvarande godt, og denne årsklassen vart hardt råka av lakselus under utvandringa i fjor. 

Forskarane hevdar at gode oppvekstvilkår i havet er den viktigaste forklaringa på det generelt gode lakseinnsiget.  Oppgangen i elvefisket i Sogn og Fjordane må også sjåast i samband med at fisketrykket i sjøen er monaleg redusert ved at kilenotsesongen først starta 10. juli.  Trass den korte sesongen har altså sjølaksefiskarene hatt gode fangstar. 

Gytefiskregistreringar i elvane stadfestar at gytebestandane i år er større samanlikna med siste halvdel av 1990-talet.  For første gong på lang tid er det i år tilstrekkeleg med gytelaks i Aurlandselva.  Frå Strynselva er det meld om god oppgang av smålaks, men den kjende storlakselva ser framleis ut til å ha lite storlaks trass i fredinga i elvefisket og sterkt utsett kilenotsesong i sjøen.  Det er gjennomført ei omfattande overvaking av rømd oppdrettsfisk i elvefisket og i overvakingsstasjonar i sjøen.  Gode gytebestandar er viktig for å redusere påverknaden frå rømd oppdrettsfisk. 

Sjøaurefangsten i Aurlandselva vart halvert i høve til den gode fjorårssesongen, og Strynselva kan i år vise til den største sjøaurefangsten i fylket med 921 kg. 

Opplysningane er baserte på innrapporterte fangstar frå dei 33 vassdraga som i år er med i den offentlege statistikken.