Pressemelding

Ope informasjonsmøte om Vaksdalsvassdraget si framtid,

onsdag 15. september kl 18-20 i Korpshuset til Vaksdal Røde Kors, Vaksdal

I samband med at Direktoratet for Naturforvalting (DN) har sendt Samla Plan ut på høyring,  der Vaksdalsvassdraget er eit av dei utgreia prosjekta, inviterer Bevaring av Vaksdalsvassdraget (BaV) til  ope informasjonsmøte.

I utkastet til Samla Plan vert det opna for å søkja konsesjon for overføring av Vaksdalsvsassdraget til Samnanger.

Med på møtet vert m.a. representantar frå Fylkesmannen si Miljøvernavdeling, som vil orientera om prosessen vidare og gjera greie for bakgrunnen for at Vaksdalsvassdraget har fått den status det har i planen.

Bevaring av Vaksdalsvassdraget er skuffa over plasseringa Vaksdalsvassdraget har fått, sett i samanheng med at det i planen vert slått fast at utbygginga medfører store negative konsekvensar m.a. for friluftslivet. 

Ei eventuell utbygging medfører mellom anna:

·  Sterkt redusert vassføring i mange større og mindre elver, blant anna Sedalselva og Vaksdalselva, samt fossen som renn frå Fossevatn

·  Anleggsarbeid i fjellvatna, som Vaksdal fiskarlag har lagt ned eit stort arbeid i for å tilretteleggja for gratis fiske

·  Bygging av to nye betongdemningar

·  Bygging av fleire vasstunnelar

·  Steinfyllingar utplassert i området

·  At den potensielle grunnvasskjelda i Sedalen vert delvis øydelagd

·  Bygging av fem kilomter anleggsveg, mellom anna over det populære familieutfartsområdet Lonastølen

·  Bygging av midlertideg høgspentline i området

BaV vil freista å hindra at det vert opna for å overføra vassdraget til Samnanger, og i den samanheng er det særs viktig kva kommunestyret i Vaksdal uttalar om utbyggingsplanane.

BaV har spesielt invitert dei folkevalde i Vaksdal til å delta på det opne informasjonsmøtet.

Vaksdal kommunestyre er bedt om å koma med uttale i samband med høyringa.

Fallrettane i Vaksdalsvassdraget er nyleg selde frå Vaksdal Industrier til Grønn Kraft, og under møtet vil det også verta orientert om korleis salet påverkar konsesjonshandsaminga.

Bevaring av Vaksdalsvassdraget har lagt ut to eksemplar av høyringsutkastet på Hjelle sin kafé på Vaksdal Senter, slik at interesserte kan setja seg inn i planen før møtet.

Me presiserer at møtet er ope for alle interesserte, uavhengig av om ein er medlem i Bav eller ikkje, eller kva syn ein har på utbyggingsplanane.